Latest News

संस्कृति साटासाट

आश गुरुङ, लम्जुङ
कार्तिक १२, २०७३- तिहारको समय कास्कीको पर्यटकीय गाउँ सिक्लेसबाट आएका युवाले लमजुङका गाउँगाउँमा संस्कृति साटासाट गरेका छन् ।

कलाकारसहितको टोलीले गाउँगाउँमा आएर गुरुङ भाषा, कला र संस्कार संस्कृतिसम्बन्धी चेतनामूलक कार्यक्रम सञ्चालन गरी टोली कास्की फर्केको छ । भाषा, संस्कार, संस्कृति लोप हुँदै गएपछि गाउँगाउँबाट सचेतना जगाउन संस्कृति आदानप्रदानमा जुटेको सिक्लेस युवा क्लबका अध्यक्ष देवीजंग गुरुङले बताए ।

करिब ३० जनाको युवा टोलीले लमजुङको पश्चिमउत्तर क्षेत्रमा पर्ने ग्रामीण भेकका गुरुङ गाउँमा सांस्कृतिक आदानप्रदान कार्यक्रम सञ्चालन गरेको हो । ‘हामीसँग भएका कला, संस्कृति र भाषालाई जोगाउने र यसको प्रचारप्रसार गर्ने हाम्रो अभियान हो,’ उनले भने, ‘यात्राका क्रममा हामीसँग भएका विभिन्न कला, संस्कृति देखायौं । भाषा, धर्म र संस्कृतिबारे प्रचारप्रसार गर्‍यौं र यहाँबारे पनि बुझ्ने मौका पायौं ।’ तिहारको समय प्राय: युवाहरू गाउँ फर्किने भएकाले अभियान चलाएको उनले बताए ।

कात्तिक २ गतेबाट सदरमुकाम बेंसीसहरदेखि सुरु भएको अभियान सार्क भिलेज घलेगाउँ, गुरुङ जातिको उद्गम गाउँ घनपोखरा, एउटै गाउँ र एउटै गाविसले चिनिएको भुजुङ, पसगाउँ हुँदै सिङी पुगेर टुंग्याइएको क्लबका सचिव देवीजंग गुरुङले बताए । लमजुङको अभियान टुंग्याइए पनि कास्कीको नागिधारलगायत गाउँमा अभियान सञ्चालन गरिने उनले बताए ।

कास्कीको सिक्लेस, ताङतिङ र लमजुङको भुजुङ, पसगाउँलगायत दक्षिण–पश्चिमी भेकको ग्रामीण क्षेत्रमा सदियौंदेखि सोलीडोली चलिरहेको छ । गुरुङ चलचित्रकी अभिनेत्री धनमाया गुरुङका अनुसार यात्राका क्रममा गाउँगाउँमा पुगेर हरेक साँझ सांस्कृतिक कार्यक्रम पनि देखाइएको थियो ।
सभार : कान्तिपुर दैनिक

Be the first to comment

Leave a Reply

Your email address will not be published.


*